Galit na galit niyang sinulyapan at tinitigan ang magarang bahay nito. "Ang gara pa pala ang bahay ng kawatang ito a," nasambit na lang niya sa galit. Kaagad siyang bumaba at kumatok sa gate nito. Kumatok siya ng kumatok nang napakalakas. Ilang sandali pa ay naramdaman niyang may papalapit na sa kanya para magbukas. At may nagbukas na nga sa pulang gate. Kaagad tumambad sa harapan niya ang mukha ng kanyang sadya roon. Nagkatitigan si Mike at ang Chief Accountant. Susuntukin na niya sana ito sa mukha ng biglang.... "Aray ko !!! Daddy!" malakas na sigaw galing sa loob ng bahay nito. Natigilan kaagad siya sa napakalakas na sigaw. Hindi niya ito natuloy na masuntok sa mukha. Agad naman itong tumalikod at tumakbo papasok pabalik ng bahay niya. Hinabol naman kaagad niya ito. Naglakad siya nang mabilis sa kahabaan ng bakuran nito. Nakita niyang nakapasok na ito sa loob at kaagad na isinara ang pinto. Bigla namang natigil ang pagsigaw sa loob ng bahay nito. Huminga siya nang malalim para muling kontrolin ang sarili niya sa malabis na pagkagalit rito. Umupo siya sandali sa nakita niyang upuan sa labas ng bahay malapit sa pintuan parang nauulanigan niyang may dalawang nag-uusap sa loob. Naghintay pa siya ng mga ilang sandali pagkatapos ay nagpasya nang katokin ang pintuan nito. Kumatok naman agad siya ng makalapit na siya. Subalit walang nagbukas kaya muli siyang kumatok. Dahan-dahan namang bumukas ang pintuan nito. Nakita niyang biglang tumalikod ang Chief Accountant pagkabukas na pagkabukas nito ng pinto. Kaya pumasok na siya kahit hindi siya inimbitahan nito. Umupo sa may sofa ito na nakatungo. Hindi makatingin ng derecho sa kanya. Halatang takot na takot ito sa kanya. Muling nag-init ang ulo niya rito kaya lumapit pa siya at umupo sa pang-isahang sofa malapit dito. Bigla naman nitong iniangat ang ulo para pagmasdan siya. Tinitigan niya ito sa mata. Bigla naman itong naluha at nagmakaawa. "Sir patawarin niyo na po ako. Nagipit lang po talaga ako. Maiilit na kasi ang bahay namin kaya nagawa ko iyon." Muli itong tumungo mula sa kinauupuan nito. Tumulo ang mga luha nito. At ilang sandali pa'y para na itong batang nag-iiyak at muling nagmakaawa. "Sir patawarin niyo na po ako... kahit ano po gagawin ko mapatawad niyo lang po ako. Kung gusto niyo ang anak ko na lang po ang ipambabayad ko sa inyo.... "

        "Ano, anong ibig mong sabihin?" nagulat na tanong niya rito.